MANILA — Sa kanyang Instagram story, diretsahang tinuligsa ni Ogie Diaz ang kawalan ng presensya ng maraming pulitiko sa naganap na protesta laban sa katiwalian.

Aniya, ilan lamang sina dating Senador Kiko Pangilinan, Bam Aquino, Leila de Lima, at human rights lawyer Chel Diokno ang namataang aktibong dumalo sa kalsada upang makiisa sa panawagan kontra korapsyon.

"Grabe, andaming pulitiko na kunwaring gustong maging free corrupt country pero piniling huwag pumunta ng kalsada. Ibig sabihin, aminado ang karamihan na, ‘Ba’t kami sasama eh may ambag din kami sa corruption?’" ani Ogie sa kanyang post.

Dagdag pa niya, nakababahala ang katahimikan ng ibang mga lider na kilala sa kanilang pananalita laban sa katiwalian ngunit hindi nagpakita ng suporta sa aktwal na pagkilos.

Umabot sa libo-libong mga mamamayan at iba’t ibang sektor ang lumahok sa protesta, ngunit para kay Ogie, ang tunay na pagsubok ay kung sino sa mga mambabatas at opisyal ang handang lumantad at manindigan laban sa maling gawain sa gobyerno—hindi lamang sa salita kundi sa gawa. (Larawan: Ogie Diaz / Instagram)