MANILA — Ginawang katatawanan ni controversial director Darryl Yap ang ideya ng premyadong filmmaker na si Lav Diaz na si Vice Ganda ang dapat tumakbong pangulo ng bansa sa darating na 2028 elections.

Sa isang Facebook post, ibinahagi ni Yap na kung siya ang tatanungin, mas gusto niyang i-nominate si BB Gandanghari bilang pangulo at si Cristy Fermin naman bilang Presidential Spokesperson. Mabilis itong umani ng reaksiyon online, kung saan ang ilan ay natawa habang ang iba nama’y nagbigay ng seryosong puna sa tila pagbasura ni Yap sa mungkahi ni Diaz.

Kasabay nito, muling sumikat sa social media ang isang matapang na pahayag noon ni BB Gandanghari laban kay Vice Ganda: “Maswerte ka, sumikat ka, dahil bobita ka.” Ang linyang ito ay muling binabalikan ng mga netizen bilang bahagi ng tila matagal nang tensyon sa pagitan ng dalawang personalidad.

Samantala, hindi pa naglalabas ng opisyal na tugon si Vice Ganda hinggil sa naging biro ni Yap o sa pagbabalik ng pahayag ni BB. Gayunpaman, patuloy ang diskusyon online kung hanggang saan ang impluwensiya ng mga celebrity sa larangan ng politika, at kung dapat ba talagang isaalang-alang ang kanilang popularidad sa usaping pambansa. (Larawan: Vice Ganda, Darry Yap / Fb)