MANILA — Kumpirmado na ang paghihiwalay ng aktor na si Gerald Anderson at aktres na si Julia Barretto matapos ang ilang taong relasyon.

Ayon sa opisyal na pahayag ng Star Magic, maayos at mutual ang naging desisyon ng dalawa na maghiwalay at magpatuloy sa kani-kanilang landas.

“Maayos at mutual ang naging paghihiwalay nina Gerald at Julia. Pareho silang nagpasya na tahakin ang kani-kanilang landas,” saad ng Star Magic.

Naging magkasintahan ang dalawa mula pa noong 2019, kasunod ng kanilang tambalan sa pelikulang Between Maybes. Umabot sa publiko ang kanilang relasyon sa kabila ng mga kontrobersiyang kinaharap, kabilang na ang isyu matapos ang paghihiwalay ni Anderson kay Bea Alonzo.

Sa kabila ng intrigang pinagdaanan, madalas na pinili nina Anderson at Barretto na panatilihing pribado ang kanilang relasyon, maliban sa iilang pagkakataong nagbahagi sila ng mga personal na larawan at mensahe sa social media.

Kasabay nito, nakatuon ngayon ang dalawa sa kani-kanilang mga proyekto. Nakalinya para kay Anderson ang isang action-drama series, habang si Barretto ay abala sa isang pelikula sa ilalim ng Star Cinema.

Hindi na idinetalye ng Star Magic ang mga dahilan ng paghihiwalay, ngunit tiniyak nito na nananatiling magkaibigan ang dalawa at magpapatuloy ang suporta sa isa’t isa sa kanilang karera.

Larawan mula sa Star Magic