OKTUBRE 23, 2025 — Mariing itinanggi ni Leyte Rep. Martin Romualdez at ng Maharlika Investment Corporation (MIC) ang mga ulat na nag-uugnay sa kanila sa Swiss-British businessman na si Patrick Mahony, na nahatulan sa kasong pandaraya kaugnay ng 1Malaysia Development Berhad (1MDB) scandal.

Sa magkahiwalay na pahayag, iginiit ni Romualdez at ng MIC na wala silang anumang koneksyon, komunikasyon, o ugnayan kay Mahony, na sinentensiyahan ng anim na taong pagkakakulong ng isang Swiss court noong 2024 dahil sa fraud, criminal mismanagement, at money laundering. Si Mahony ay pansamantalang malaya habang nakabinbin ang kanyang apela.

“I have never had any discussion, meeting, or communication with any individual regarding investments, advisory roles, or management decisions involving the Maharlika Wealth Fund,” pahayag ni Romualdez. 

(Wala akong naging usapan, pagpupulong, o komunikasyon sa sinumang tao kaugnay ng pamumuhunan, papel bilang tagapayo, o mga desisyong pangpamunuan ng Maharlika Wealth Fund.)

Dagdag pa niya, “The reports attempting to link me to such matters are entirely unfounded, misleading, and malicious.” 

(Ang mga ulat na nag-uugnay sa akin sa mga ganitong bagay ay walang batayan, mapanlinlang, at may masamang layunin.)

Ang mga akusasyon ay lumabas sa ulat ng Malaysia-based investigative outlet na Sarawak Report, kung saan sinabing si Mahony ay umano’y tagapayo ng Maharlika Wealth Fund at madalas makita kasama si Romualdez sa Maynila. Ayon pa sa ulat, lumipat na raw si Mahony sa Makati kasama ang kanyang pamilya at may opisina sa Alpha Suites.

Mariin din itong pinabulaanan ng MIC.

“Mr. Mahony has not been and has never been engaged by MIC in any capacity, whether formal or otherwise,” ayon sa pahayag ng korporasyon. 

(Si G. Mahony ay hindi kailanman naging bahagi ng MIC sa anumang paraan, pormal man o hindi.)

Tinawag ng MIC ang mga ulat bilang “false, baseless, and damaging,” at nanawagan ng agarang pagwawasto o pagbawi ng mga maling impormasyon upang hindi na ito kumalat.

Binigyang-diin ng MIC na ang kanilang operasyon ay alinsunod sa legal na mandato at pinamumunuan ng mga kwalipikadong propesyonal sa larangan ng pamumuhunan at batas.

“MIC is composed of highly qualified professionals … who uphold the highest standards of competence, integrity, and accountability,” saad ng pahayag. 

(Ang MIC ay binubuo ng mga lubos na kwalipikadong propesyonal … na sumusunod sa pinakamataas na pamantayan ng kakayahan, integridad, at pananagutan.)

(Larawan: Philippine News Agency)