OKTUBRE 23, 2025 — Isang hindi awtorisadong ₱150 milyong proposal para sa subscription ng libreng Wi-Fi sa Antique ang muling nagbunyag ng umano’y sobrang singil sa proyekto ng Department of Information and Communications Technology (DICT).

Sa pagdinig ng Senate subcommittee on finance, ibinunyag ni Senador Loren Legarda ang dokumentong ipinadala sa kanyang opisina na naglalaman ng detalyadong breakdown ng subscription cost — ngunit walang pirma at hindi dumaan sa tamang proseso. Ayon sa kanya, ang halagang hinihingi ay para sa simpleng renewal lamang ng serbisyo.

Kinumpirma ni DICT Secretary Henry Aguda na ang naturang proposal ay hindi aprubado at labis ang halaga. 

“One, that is overpriced,” ani Aguda. “Masyadong mahal yun.” 

Batay sa dokumento, nasa ₱90,116 kada buwan ang singil para sa isang site sa Antique. Ngunit matapos ang internal audit ng DICT, lumabas na dapat ay ₱26,000 lamang ang tamang halaga. 

“So with our new computation, we’ll only be paying about P26,000 per site per month for the subscription service,” paliwanag ni DICT Undersecretary Christina Faye Condez-De Sagon. 

(Sa bagong computation namin, ₱26,000 na lang kada site bawat buwan ang babayaran para sa subscription service.)

Dagdag pa ni De Sagon, ang pagbagsak ng presyo ay resulta ng masusing pagsusuri sa mga kontrata ng ahensya. 

“We’re rationalizing all the contracts; we’re reviewing all the contracts in the department,” aniya. 

(Inaayos namin ang lahat ng kontrata; nire-review namin ang lahat ng kontrata sa departamento.)

Bukod sa bagong ₱150 milyon, may nauna nang ₱71 milyon at isa pang ₱150 milyon na inilaan para sa parehong proyekto. Isa sa mga sangkot sa pagpapadala ng dokumento ay sinuspinde na, habang ang isa pa ay wala nang koneksyon sa DICT.

Kinumpirma rin ni Aguda na ang dokumento ay galing sa central office ng DICT, base sa pahayag ng regional director. 

“I think we can put it on record that the regional director is attesting that this document came from the central office that was sent to you,” ani Aguda. 

(Sa tingin ko, maaari nating ilagay sa record na ang regional director ay nagpapatunay na ang dokumentong ito ay galing sa central office na ipinadala sa inyo.)

Hindi ito ang unang beses na nasangkot ang DICT sa alegasyon ng overpricing. Noong 2021, sinabi ni dating DICT Undersecretary Eliseo Rio na ang ₱466 milyong procurement para sa managed internet service ay limang beses na mas mahal kumpara sa proyekto ng United Nations Development Program. 

“There were four awardees, all of them, cost per site per year is approximately five times more than the UNDP,” ani Rio. 

(May apat na awardees, lahat sila, ang gastos kada site kada taon ay halos limang beses na mas mahal kaysa sa UNDP.)

Sa kasalukuyan, gumagastos ang DICT ng tinatayang ₱6.5 bilyon kada taon para sa mahigit 7,000 Wi-Fi sites sa buong bansa. Dahil dito, isinusulong ng ahensya ang malawakang reporma sa programa upang mapababa ang gastos at matiyak ang transparency.

Ang mga natuklasan ay isinumite na sa Commission on Audit para sa mas malalim na imbestigasyon.

(Larawan: Philippine News Agency)