MANILA — Tiniyak ng Philippine National Police (PNP) na handa silang harapin ang anumang kilos-protesta sa bansa, kasunod ng mga kaguluhan na naganap sa Nepal at Indonesia nitong mga nakaraang araw.

Sa isang pahayag, sinabi ni PNP acting chief P/Lt. Gen. Jose Melencio Nartatez Jr. na may nakalatag na silang comprehensive security plan upang mapanatili ang kaayusan at seguridad, lalo na sa Metro Manila.

“We are continuously monitoring the peace and order and safety in Metro Manila, [but also] nationwide,” ani Nartatez.

Dagdag pa rito, tiniyak din ng National Capital Region Police Office (NCRPO) na handa silang tumugon sa mga kasalukuyan at nakaambang kilos-protesta sa rehiyon. Anila, nakahanda ang kanilang pwersa upang tiyakin ang maayos na daloy ng trapiko, seguridad ng mga establisimyento, at kaligtasan ng mga mamamayan.

Kaugnay nito, pinaalalahanan ng PNP ang publiko na bagama’t ginagarantiya ng Konstitusyon ang karapatang magpahayag at magpiket, kailangang isagawa ito sa mapayapa at organisadong paraan upang maiwasan ang anumang kaguluhan o sakuna.

Samantala, hindi naman idinetalye ng PNP kung may natatanggap na silang konkretong banta o impormasyon hinggil sa posibilidad ng malakihang protesta sa bansa. Gayunman, nananatili raw silang alerto at nakikipag-ugnayan sa iba’t ibang ahensya ng gobyerno para sa mabilis na aksyon kung kinakailangan.

Ang naging pahayag ng PNP ay nagsisilbing paalala na nananatiling nakabantay ang mga awtoridad laban sa anumang posibleng panganib sa seguridad ng publiko at kaayusan ng lipunan. (Larawan: PNP / Fb)