Makati – Nababahala ang ilang residente ng Forbes Park sa posibilidad na madamay ang kanilang subdivision sa nakatakdang kilos-protesta laban sa korapsyon sa Setyembre 13. Dahil dito, humiling sila sa kanilang homeowners’ association na higpitan ang seguridad at makipag-ugnayan sa mga otoridad upang mapanatili ang katahimikan sa loob ng komunidad.

Ayon sa mga lumalabas na ulat sa social media, may espekulasyong maaaring magtuloy ang mga raliyista patungong Forbes Park. Bagama’t wala pang opisyal na kumpirmasyon mula sa mga organizer ng protesta o sa lokal na pamahalaan hinggil sa naturang ruta, sapat na ito para ikabahala ng mga residente. May ilan ding panawagan na makipag-ugnayan agad ang pamunuan ng subdivision sa pulisya at barangay upang maiwasan ang anumang posibleng insidente.

Tiniyak naman ng mga otoridad na naka-monitor sila sa mga aktibidad sa darating na protesta. Ayon sa paunang impormasyon, inaasahang libo-libong katao ang lalahok at magsasagawa ng pagtitipon sa iba’t ibang lugar sa Metro Manila. Gayunpaman, nananatiling malinaw na wala pang pahayag na nagsasabing bahagi ng opisyal na ruta ng protesta ang Forbes Park.

Sa ngayon, ang pangamba ng mga residente ay nakasentro sa mga kumakalat na haka-haka online hinggil sa posibleng mob attack. Sa kabila nito, umaasa sila na magiging maayos at mapayapa ang gagawing demonstrasyon at hindi madadamay ang kanilang pamayanan.

Larawan mula sa Wikipedia