Oktubre 3, 2025 – Naglabas ng opisyal na paghingi ng paumanhin ngayong araw ang Filipino Academy of Movie Arts and Sciences (FAMAS) matapos magdulot ng kalituhan at pagkabahala sa publiko dahil sa isang maling anunsyo hinggil sa diumano’y pagpanaw ng beteranang aktres at humanitarian na si Rosa Rosal.

Sa kanilang opisyal na social media page, nag-post ang FAMAS ng isang art card na may nakasaad na pumanaw na si Rosal, na kilala rin sa kanyang tunay na pangalan na Florence Lansang Danon, sa edad na 96. Naka-indicate pa sa post ang pagbibigay-pugay sa kontribusyon ng aktres sa larangan ng pelikula at serbisyo publiko.

Gayunman, ilang oras matapos lumabas ang post, agad itong pinabulaanan ng pamilya ng aktres. Ayon sa apo ni Rosa Rosal na si William Thio, walang katotohanan ang lumabas na balita at nananatiling nasa mabuting kalagayan ang kanyang lola sa kanilang tahanan. Dahil dito, umani ng batikos at pagdududa ang FAMAS mula sa publiko dahil sa kakulangan umano ng beripikasyon bago ilabas ang naturang sensitibong impormasyon.

Matapos kumalat ang isyu, agad na tinanggal ng FAMAS ang kanilang post at naglabas ng pahayag ng paghingi ng paumanhin. Sa kanilang opisyal na paglilinaw, inamin ng organisasyon na nagkulang sila sa masusing pagbe-verify ng impormasyon. Nangako rin silang magiging mas maingat at responsable sa mga susunod na pagkakataon, lalo na sa mga anunsyong may kinalaman sa kalusugan o buhay ng mga personalidad.

“Lubos kaming humihingi ng paumanhin sa pamilya ni Ms. Rosa Rosal at sa publiko sa naidulot na kalituhan at pagkabahala. Sisikapin naming tiyakin na ang lahat ng aming pahayag ay dumaan sa masusing beripikasyon,” bahagi ng opisyal na pahayag ng FAMAS.

Si Rosa Rosal ay kilalang haligi ng pelikulang Pilipino at nakilala sa kanyang mga iconic na papel sa lokal na industriya ng showbiz noong dekada ’50 at ’60. Higit sa kanyang kontribusyon sa sining, mas nakilala siya sa kanyang matagal na serbisyo bilang volunteer at opisyal ng Philippine Red Cross, kung saan naglaan siya ng maraming taon sa pagtulong sa mga nangangailangan. Dahil dito, iginawad sa kanya ang prestihiyosong Ramon Magsaysay Award for Public Service, na tinuturing na Nobel Prize ng Asya.

Sa kabila ng maling anunsyo, nagbigay-diin ang pamilya na nagpapasalamat sila sa patuloy na pag-aalala ng publiko at mga tagahanga kay Rosa Rosal, ngunit nanawagan din sila ng mas maingat na pagbabahagi ng impormasyon upang maiwasan ang pagkalat ng maling balita, lalo na’t sensitibo ang usapin ng buhay at kamatayan.

Larawaran: Deleted photo Famas Facebook