SYDNEY, Australia — Nagbunsod ng matinding pagkabahala at pagkondena ang insidente sa isang sementeryo sa kanlurang bahagi ng Sydney matapos umanong maglagay ng mga ulo ng baboy sa mga libingan ng mga Muslim sa Narellan Cemetery sa Camden. Ayon sa mga ulat, ang nasabing insidente ay itinuturing na isang nakakabahalang “ganti” kasunod ng madugong pag-atake sa Bondi Beach na ikinasawi ng maraming sibilyan.

Mariing kinondena ng kilalang Muslim undertaker na si Ahmad Hraichie ang naturang gawain, na tinawag niyang walang saysay at puno ng galit. Ayon kay Hraichie, ang paglapastangan sa mga libingan ay hindi naghahatid ng hustisya at lalo lamang nagpapalala ng galit at pagkakahati-hati ng komunidad. Binigyang-diin niya na ang mga taong nakahimlay sa mga libingan ay matagal nang pumanaw at walang kinalaman sa kasalukuyang mga pangyayari.

“Ang mga libingan ay lugar ng pahinga, dignidad, at respeto—anuman ang pananampalataya,” giit ni Hraichie, sabay panawagan na igalang ang pagkatao at sangkatauhan ng bawat isa. Dagdag pa niya, ang ganitong mga kilos ay nagpapakita lamang ng kawalan ng malasakit at pagkatao.

Kasabay nito, inihayag ng mga lider ng Muslim sa Sydney na tatanggi silang tanggapin o isagawa ang funeral rites para sa mga salarin sa Bondi Beach attack, na kinilalang sina Naveed Akram, 24, at ang kanyang ama na si Sajid Akram, 50. Ayon sa pulisya, 16 na katao ang nasawi sa insidente, kabilang ang isa sa mga salarin, habang mahigit 40 ang nasugatan.

Ayon kay Dr. Jamal Rifi, isang prominenteng lider Islamiko sa Sydney, hindi kinikilala ng komunidad ang mga salarin bilang bahagi ng Islam. Aniya, malinaw sa turo ng Islam na ang pagpatay sa inosente ay katumbas ng pagpatay sa buong sangkatauhan. Ipinunto rin niyang ginawa na ito ng komunidad noon sa Lindt Café siege noong 2014, kung saan tumanggi rin silang tanggapin ang bangkay ng salarin. Mariin ding kinondena ng Australian National Imams Council ang karahasan at nanawagan ng pagkakaisa, malasakit, at pakikiisa sa mga biktima at kanilang mga pamilya. Sa gitna ng trahedya, muling iginiit ng mga lider ng pananampalataya ang kahalagahan ng kapayapaan at respeto sa lahat ng komunidad. (Larawan: Daily Mail)