Setyembre 12, 2025 – Pormal na inilunsad ng Movie and Television Review and Classification Board (MTRCB) ang pambansang kampanya na “Bagong Pilipino, Tara, Nood Tayo!” na layong palakasin ang suporta ng publiko sa lokal na pelikula at programang pang-telebisyon. Tampok sa paglulunsad ang star-studded na infomercial na sabay-sabay ipinalabas sa mga sinehan, telebisyon at digital platforms sa buong bansa.

Pinangunahan mismo ng Pangulong Ferdinand Marcos Jr. ang programa, kasama ang Unang Ginang Liza Araneta-Marcos at ang buong Unang Pamilya. Sa kanyang talumpati, tiniyak ng Pangulo na susuportahan ng administrasyon ang industriya ng pelikula at telebisyon. Aniya, “ang bagong Pilipino ay ipinagmamalaki ang kuwentong Pilipino,” at kaisa ng pamahalaan ang pribadong sektor sa pagtataguyod nito.

Nagpasalamat naman si MTRCB Chairperson Lala Sotto sa Pangulo, sa Unang Pamilya at sa mga kasamahan sa industriya sa kanilang pagtitiwala sa kampanya. Giit niya, ang proyekto ay hindi lamang tungkol sa pagtangkilik ng lokal na likha kundi pati na rin sa pagsusulong ng responsableng panonood sa bawat pamilyang Pilipino.

Nakibahagi rin ang mga pangunahing opisyal mula sa malalaking network kabilang ang GMA, ABS-CBN, TV5 at ALLTV, na nagpahayag kung paano ang kanilang mga palabas ay naging bahagi na ng pang-araw-araw na buhay ng mga Pilipino. Mula sa pagbibigay-alam sa balita hanggang sa paghubog ng mga karakter na minamahal ng publiko, iginiit ng mga network na malalim na nakaugat sa kulturang Pilipino ang lokal na media.

Kasama rin sa paglulunsad ang mga batikang direktor at artista. Paalala ni Cathy Garcia-Sampana, ang pelikula at teleserye ay “repleksyon ng ating pagka-Pilipino.” Nagbigay ng suporta sina Kathryn Bernardo at Alden Richards na naglarawan sa industriya bilang totoo at inklusibo. Para naman kina Judy Ann Santos at Ryan Agoncillo, ang pelikula at telebisyon ay nagsisilbing “ikalawang tahanan ng bawat pamilyang Pilipino.”

Samantala, sina Piolo Pascual, Coco Martin at Vic Sotto ay nagpahayag ng pag-asa para sa masiglang kinabukasan ng lokal na produksyon, lalo na para sa susunod na henerasyon ng mga manonood at manggagawa sa industriya.

Nagbigay-diin din ang mga kinatawan mula sa malalaking mall operators tulad ng SM, Ayala at Robinsons na mananatiling mahalagang karanasan ang panonood sa sinehan. Iginiit nilang ang pagpunta sa pelikula ay hindi lamang libangan kundi bahagi ng masayang alaala ng pamilyang Pilipino.

Kabilang din ang mga film producers tulad ng Regal Entertainment at Viva Communications na nagpahayag na ang panonood ng pelikula kasama ang pamilya ay isang tradisyon na patuloy na magpapatibay sa ugnayan ng bawat Pilipino.

Layunin ng “Bagong Pilipino, Tara, Nood Tayo!” na ipakita na ang pelikulang Pilipino at mga palabas sa telebisyon ay hindi lamang produkto ng aliwan kundi salamin ng kulturang Pilipino. Sa pamamagitan ng malawak na partisipasyon ng gobyerno, industriya, artista at pribadong sektor, umaasa ang MTRCB na muling sisigla ang lokal na panonood at muling magiging sentro ng pagkakaisa at pagmamalaking pambansa ang pelikulang Pilipino.

Larawan mula sa Presidential Communications  Office